《無敵貓劍俠》Puss In Boots - 1月21日 貓賀新禧
《史力加》、《功夫熊貓》創作班底笑聲打造
未成名之前嘅佢絕密身世爆趣揭露！
各位觀眾，貓王駕到！今個農曆年，《史力加》系列、《功夫熊貓2》幕後精英落足十二成功力爆笑打造，一個關於《史力加》系列最受歡迎人物「皮靴貓」(Puss In Boot)嘅瘋狂歷險故事。《黑俠梭羅》型男安東尼奧班達拉斯(Antonio Banderas)繼續聲演身手敏捷嘅皮靴貓；加上拉丁情人莎瑪希恩(Salma Hayek)化身成全新角色「綿掌貓女俠」(Kitty Softpaws)，以及《醉爆伴郎團》搞鬼肥仔嘜碩加利費維基斯(Zach Galifianakis)聲演嘅大壞「蛋」「蛋散阿歷山大」(Humpty Alexander Dumpty)，兩貓一蛋拍硬擋，出發尋找傳說中嘅魔幻仙豆，保證抵死過癮！夢工場賀歲鉅獻《無敵貓劍俠》，2012年1月21日，3D現身，貓聲賀歲！
為冒險而生 為正義而戰；敵人有九把刀 佢就有九條命！
無敵劍俠─皮靴貓！
話說腳踏長靴、劍法一流嘅皮靴貓，一向Chok住嚟行俠仗義，深受萬民愛戴！但係有一次，佢終於遇上一生中最大考驗…為咗喺阿積同阿招手上偷走絕迹咗幾個世紀嘅傳說魔豆；爭奪一隻世人夢寐以求、會生金蛋嘅金鵝，皮靴貓遇到佢一生中最強嘅敵人：美麗動人、專搞作對嘅綿掌貓女俠；以及一齊喺孤兒院長大嘅沙煲兄弟蛋散阿歷山大，兩貓一蛋拍硬擋，展開一場魔幻歷奇大冒險！
一隻係型貓 一隻係索貓賊？ 兩個生番大惡人 外加一件蛋散！
《無敵貓劍俠》人物角色簡介
皮靴貓 (安東尼奧班達拉斯 聲演)
靠自己一對貓爪，加上一雙可愛到爆嘅水汪汪眼睛，縱橫歐洲大陸無敵手。昻藏兩尺嘅佢，為「貓」行俠仗義、風流倜儻，除了深得女士們歡心，更加係舉世聞名最膽大嘅浪人劍客。但原來英雄背後，都有一段不堪傷心往事！？話說當年皮靴貓曾經被「黃紙兄弟」蛋散阿歷山大出賣；從此，他就要離鄉別井，忍痛跟孤兒院及養母話別，開展流浪旅途…今日，皮靴貓重遇「老死」蛋散，仇人見面，究竟會係分外眼紅打餐飽，抑或是冰釋前嫌合作奪寶！？大家記得落足眼力入場睇真啲！
蛋散阿歷山大 (英語：碩加利費維基斯 /粵語：張智霖 聲演)
一隻唔適合整蛋撻，更加唔啱用嚟做蛋糕嘅超級無敵大「壞蛋」，佢叫─蛋散阿歷山大！咪睇蛋散個樣懵盛盛，查實佢擁有世界上最聰明嘅頭腦。平日唔止計仔多，仲立志聯同童年好兄弟皮靴貓，去尋找傳說中嘅魔豆；但因為「那些年」嘅一件背叛事件，令到兄弟反目。今日，蛋散又再出現喺皮靴貓面前，究竟係想老友聚舊？抑或另有陰謀？呢對「貓蛋兄弟」，最終會唔會合作，「硬爆」巨人城堡呢？大家拭目以待！
綿掌貓女俠 (希瑪莎恩 聲演)
令人聞風喪膽嘅超索賊女，成日chok樣扮cool，更想以舞蹈及劍道稱霸貓林。身手不凡嘅佢，既野性又性感，皮靴貓對佢神魂癲倒。貓女俠之後更被蛋散招攬，成為尋找魔豆嘅其中一份子。但正所謂貓心難側，呢個會唔會係引「情聖」皮靴貓入局嘅陷阱呢？
招與積
兩名臭名遠播、聯手犯罪嘅情侶賊拍檔；殺人劏人唔眨眼，堅過《天與地》。貪得無厭、奸詐招積，妄想攻入巨人城堡，偷取傳說中會生金蛋嘅鵝；遇到佢哋，皮靴貓今次有麻煩！
《無敵貓劍俠》 聲演陣容、導演簡介
安東尼奧班達拉斯 Antonio Banderas
有「拉丁情聖」之稱嘅安東尼奧班達拉斯，早於80年代，就參演當時仍未成名的西班牙國寶級電影大師艾慕杜華(Pedro Almodovar)的作品《激情迷宮》(Labyrinth of Passion)，演戲才華亦從此時開始被發掘。之後，安東尼奧班達拉斯漸漸成為艾氏電影中的重要男演員角色，先後合作了《鬥牛勇士》(Matador)、《慾望之規條》(Law of Desire)、《女為悅己者狂》(Women on the Verge of a Nervous Breakdown)、《綑著我困著我》(Tie Me Up! Tie Me Down!)等等，使安東尼奧班達拉斯得以揚名國際，進軍荷里活。他於荷里活發展頗為順利，91年憑《貝隆夫人》(Evita)奪得金奬奬喜劇/音樂劇類最佳男演員；之後還有《費城故事》(Philadelphia)、《吸血迷情》(Interview with the Vampire)、《最後刺客》(Assassins)、《遇上陌生情人》(You Will Meet a Tall Dark Stranger)等。至於系列作品，就有超賣座動畫作品《史力加》
系列(Shrek Series)；跟嘉芙蓮薛達鍾斯(Catherine Zeta Jones)合作、大賣西班牙劍俠風情的《黑俠梭羅》系列(The Mask of Zorro Series)；此系列更啓發了夢工場團隊創作出「皮靴貓」這個角色。此外，還有與羅洛迪格斯(Robert Rodriquez)合作的《非常小特務》系列(Spy Kids Series)；以及與《無敵貓劍俠》女主角希瑪莎恩合演的三步殺人曲系列(Desperado Series)等。
最近，安東尼奧班達拉斯除了忙於替最近拍畢、闊別多年後再度合作的艾慕杜華新片《我的華麗皮囊》(The Skin I Live In)作宣傳外；稍後還要完成大導演史提芬蘇德堡(Steven Soderbergh)的新片《Haywire》，以及法國導演尚積葵阿諾(Jean-Jacques Annaud)的《Black Gold》。至於明年，則有《陽光小小姐》導演Jonathan Dayton、Valerie Faris執導的《He Loves Me》
希瑪莎恩 Salma Hayek
墨西哥出生的莎瑪希恩可說是近十年來墨西哥最出色性感的女演員，自九四年與安東尼奧班達拉斯合演《三步殺人曲》成名，走紅荷里活，先後主演過《殺出個黎明》(From Dust Till Dawn)、《54今夜星光誘惑》(54)、《殺手攻略》(Once Upon a Time in Mexico)、《超智特務顯神通》(Wild Wild West)、戀愛心曲(Across the Universe)、《筆姬別戀》(Frida)、《毒網》(Traffic)、《中坑同學會》(Grown Ups)；大熱電視劇《「俏」Betty》(Ugly Petty)、《30 Rock》等等。曾經被《Glamour》雜誌頒發「年度女性奬項」，亦被《時代雜誌》選為「25位最具影響力西班牙人」之一；希瑪莎恩時常被喻為性感又美麗的拉丁銀幕情人；此外，她更是史上首位被提名奧斯卡影后的墨西哥女星，亦是第二位被提名的拉丁美裔女演員。
碩加利費維基斯Zach Galifianakis
擁有喜劇演員、歌手、綜藝節目編劇等多重身份。2001年，碩加利費維基
斯憑着喜劇《Out Cold》中的爆笑演出，正式踏入荷里活影壇。「響朵」之作《醉爆伴郎團》(The Hangover)第一二集，更於全球輕易摘下接近10億美元的票房成績。他在片中的搞鬼演出，直接令他獲得與其他荷里活巨星，包括《神探福爾摩斯》(Sherlock Holmes)羅拔唐尼(Robert Downey Jr.)合作電影《臨盆急先瘋》(Due Date)，以及夥拍佐治古尼演出《寡佬飛行日記》(Up in the Air)的機會。兩套作品，堪稱是他在荷里活發展的里程碑。早期有份參演的電影，還包括《千你奇緣》(Heartbreakers)、《泡抱美人歸》(Bubble Boy)、《Visioneers》、《一夜賭城戀大咗》(What Happens in Vegas)等多齣賣座喜劇電影，可謂奠定了新一代笑匠的地位。除此以外，碩加利費維基斯還作多方面的嘗試，其中演出劇情片《浪蕩天涯》(Into the Wild)，以及為著名繞舌歌手Kanye West客串MV “Can’t Tell me Nothing”，都充份表現出他的多才多藝。
導演 基斯米拿 Chris Miller
作為夢工場其中一位最資深的動畫師，基斯米拿曾經替《史力加3》(Shrek The Third)擔任導演，以及《史力加》1、2、3集的編劇崗位。除了畫功了得，基斯米拿又經常為動畫電影配音，好像《天煞撞正怪怪獸》(Monsters V.S. Aliens)、《荒失失奇兵》(Madagascar)等，都有他聲演的角色；今次《無敵貓剣俠》，大家當然亦都可以聽到他的演出，聲演旅店老闆。 本帖最後由 Ken704 於 2012-1-4 01:22 編輯
上天落地 勇闖巨人城堡！ 《無敵貓劍俠》驚險場面優先連環睇
鬼鬼祟祟偷魔豆 “IS THE MISSION POSSIBLE”！？
皮靴貓知道自己千辛萬苦尋找咗好多年、傳說中嘅魔豆就喺兩大惡人：招與積手中，立即唔理三七二十一，夜媽媽化身「職業特工貓」從天而降，潛入佢哋入住嘅房間當中。以為神不知鬼不覺嘅“Mission Impossible”，竟然俾一隻全身「蝙蝠俠」打扮嘅貓賊破壞，落得俾招與積發現嘅下場…情勢危急，究竟皮靴貓走唔走得甩！？
黑夜追逐、舞林激鬥 索貓女竟然係死對頭！
憑著天生符碌到震嘅特質，皮靴貓僥倖逃出招、積房間，追捕陷佢於不二嘅可惡貓賊。貓俠與貓賊，喺充滿西班牙建築特色嘅屋頂之間穿梭，展開一場驚險刺激追逐戰…皮靴貓最後追到嚟一間地下酒窖。喺一班鮮奶當酒飲嘅貓界蒲友熱情吶喊下，皮靴貓與貓賊上演咗一場「舞」林激鬥；最後仲發現貓賊真正身份，原來就係綿掌貓女俠，而幕後主腦亦相繼現身，佢竟然就係…！？
為咗令到動畫中嘅舞蹈場面更加真實流暢，電影公司特別請嚟洛杉磯Helios Dance Theatre創辦人Laura Gorenstein Miller，親身演繹佛朗明哥(Flamenco)、拉丁標準舞(Latin Ballroom)以及現代舞(Contemporary)；再透過近年十分流行嘅3D動畫製作技術─「動態捕捉技術」(Motion Capture Technology)，令到呢場3D「舞鬥」場面更加活靈活現。
沖上雲霄 硬破巨人城堡！任務失敗？隨時渣都冇！
經過連場大龍鳳，皮靴貓、綿掌貓女俠和蛋散阿歷山大終於任務達成，搶到魔豆，成功攀上萬呎樹藤，到達咗巨人城堡…處身呢個浮雲上嘅天空之城，佢哋先至發現原來傳說中嘅巨人已經一早死咗，但卻剩底一隻比佢更可怕嘅守護獸去看管果隻會生金蛋嘅鵝！？蛋散為求達到目的，更不惜犠牲色相，化身「黃金蛋」，試圖瞞天過海…呢個如意算盤真係打得響？定係落得失敗收場？大家記住入場留意！
那些年嘅歲月 沒有大笨蛋 只有一隻…大壞蛋！？
那些年，沒有一起追的女孩，但就注定要同甘共苦，兄弟有難一齊捱！講緊嘅係皮靴貓同蛋散阿歷山大。童年時，佢哋一個係被人遺棄喺孤兒院門前嘅流浪貓，另一個係滿懷大志嘅小小發明家；佢哋惺惺相惜，歃血為盟，隨即就開始四出搗蛋作惡，堪稱係童年版《古惑仔》…乜解究呢對黃紙兄弟，最後會反目成仇？背後竟然同一宗金庫劫案有關？
同場加映，解構皮靴貓點解會成日眼仔碌碌去冧人；徹底話你知，秘技是怎樣鍊成的！？
反轉童話國度 解構皮靴貓、蛋散嘅真正身份！？
夢工場一向喜歡反傳統，將經典童話重新演繹；今次亦唔例外。《無敵貓劍俠》入面嘅兩位主角：皮靴貓、蛋散阿歷山大，原來都大有來頭，睇吓你哋對佢兩位嘅「真身」，又知道幾多？
“Humpty-Dumpty sat on a wall” 重高而落 睇佢點收科！
由英國古典兒童讀物Mother Goose Nursery Rhymes中節錄出嚟嘅其
中一個人物。話說原著故事中嘅Humpty Dumpty最鍾意坐喺一道高圍牆之上，成日招招積積；有一日，佢終於從牆上跌咗落嚟，成為「蛋散」，國王嘅兵馬試圖幫佢復原，但係都唔成功：
“Humpty-Dumpty sat on a wall, Humpty-Dumpty had a great fall; All the king’s horse, and all the king’s men cannot put Humpty-Dumpty together again.”
故事喻意事情一旦發生，好多時候都唔能夠補救，行事前要三思！但《無》中嘅蛋散阿歷山大，偏偏天不怕地不怕，究竟佢最終會否難逃宿命，淪為名副其實嘅「蛋散」？大家記得落足眼力入場留意！
法國名種貓 變咗西班牙皮靴貓 風流倜儻問你點擋！
皮靴貓喺監倉入面遇到一位名叫傑克(Jack)嘅老公公，咪睇佢衣衫不整成個流浪漢，查實佢就係經典童話《傑克與巨人》中嘅男主角。原著故事，係講貧窮嘅傑克為咗幫媽媽醫病，於是將家中唯一嘅母牛賣咗，換嚟五粒法力無邊嘅魔豆；傑克媽媽以為兒子被騙，將魔豆丟到空地上；點知第二日就長出一條直沖雲霄嘅大樹藤。傑克爬上樹藤，喺巨人城堡入面偷走咗一隻會生金蛋嘅鵝，換嚟巨人對佢嘅追殺！危急關頭，傑克將樹藤斬斷，巨人跌死，故事大團圓結局。之但係以夢工場一貫惡搞童話嘅手法，呢場傑克與巨人嘅戰鬥只會更爆更好玩；而無咗傑克，對付巨人嘅責任就只好拜托正義又勇嘅皮靴貓！
《Puss In Boots》係Charles Perrault喺17世紀創作嘅經典童話。故事講述，一位父親病重逝世，兩位兒子將佢嘅家產瓜分，只留低一隻貓及一對爛皮靴俾最細嘅三兒子；點知呢隻貓咪著起對靴之後，立即化身機智勇敢嘅劍俠，幫助三兒子戰勝所有困難，贏得巨額財富，娶得美麗嘅公主為妻，從此快快樂樂生活！《無敵貓劍俠》中嘅皮靴貓除咗同樣身手了得又精靈之外，仲有幾份拉丁風情、風流倜儻；今個農曆新年，你唔係唔捧佢場吖嘛！
張智霖落力聲演 變身蛋散阿歷山大
《無敵貓劍俠》特別揾嚟個樣好似剥殼雞蛋一樣咁皮光肉滑嘅張智霖，替蛋敵阿歷山大配音。Chilam更坦言，自己好榮幸替《無》片聲演；第一次為動畫配音，就可以一嘗做壞蛋嘅滋味！
張：張智霖 Q：問題
Q: 可唔可以介紹吓你喺《無敵貓劍俠》入面聲演嘅角色？
張: 我今次聲演嘅角色叫「蛋散阿歷山大」，係源自一個好出名嘅外國童話人物“Humpty Dumpty”。我覺得佢個樣真係好似我，直頭係照住我嚟畫一樣，令我配起音上嚟都零舍有共鳴，哈！
Q: 請介紹吓蛋散喺《無敵貓劍俠》入面，有咩遭遇？
張: 佢會聯同好兄弟皮靴貓，以及全新角色綿掌貓女俠，一齊出發，喺阿招同阿積手中偷走傳說中嘅魔豆，爭奪一隻會生金蛋嘅鵝；過程驚險百出，充滿「夢工場」一貫惡搞童話故事嘅元素，大家記得留意喇！
Q: 你本身對主角皮靴貓有乜嘢認識？
張: 我本身好鍾意皮靴貓，屋企仲收藏咗佢嘅mini figure添。皮靴貓個樣成日都楚楚可憐咁款，好似細路仔撒嬌一樣，令人又愛又恨；但係好真。上次去環球片場玩，我仲捉住隻同我一樣咁高嘅皮靴貓嚟合照，你就知我幾愛佢喇！
Q: 乜嘢原因促使你聲演蛋散呢個角色？
張: 查實「蛋散真係好蛋散」，佢成日出賣皮靴貓，由細到大，每次喺孤兒院闖咗禍，都要皮靴貓執手尾…但係咁樣反而好人性化，寫嚟做真人電影劇本一定好吸引；加上呢套動畫嘅故事豐富，我更加可以邊睇邊配，率先睇哂成部動畫。咁多着數，電影公司一揾我，我就馬上答應喇！
Q: 你覺得自己同呢個角色有乜嘢最相似嘅地方？
張: 我同蛋散最似嘅地方，就係大家對朋友都好重感情。其實今次係我首次幫動畫角色配音；但我實在太愛蛋散，所以都好樂意將呢個「第一次」奉獻俾佢。
Q: 除咗蛋散阿歷山大之外，你會想為邊一個角色配音呢？主角皮靴貓？定係新角色綿掌貓女俠？
張: 再揀，我都係揀返蛋散。佢「好又好唔哂，衰又衰唔哂」嘅特質好鬼吸引我囉。為佢配音真係好有挑戰性架。
1月21日 貓賀新禧 本帖最後由 Ken704 於 2012-1-4 01:40 編輯
《無敵貓劍俠》Puss In Boots - 1月21日 貓賀新禧
如果唔係3D都會捧下場~- 發送自我的 iPhone 大板凳應用 Expected! But US BD is coming.......... 講緊我{:1_352:}
回復 6# SonSon
Yes! Just for u! Friend! DVD release on 2012-02-24 睇完。。。感覺一般。。未算好精采～～ 睇咗! 普普通通! 3D效果麻麻!
頁:
[1]
2