認識小弟既都會知小弟係永遠既月光族, 荷包永遠無銀用, 銀行結餘永遠係出debit~~~ 呢十幾年嚟都無咩去現場睇演唱會, 就算有(好似上年既Mi)都唯有係老闆(即老婆)出錢叫小弟去.....{:9_440:}
但早喺幾個月前~~ 小弟收到HKT Premier既一個message, 諗都無咩點諗就做咗個決定, 而呢個決定連老婆都嚇咗一驚~~~ {:9_433:} 買咗2張HK$1280既演唱會飛, 當然老婆第二句就已經問我"錢從何來?".....
其實小弟有幾鍾意玉置浩二? 連樓下既鄰居都話成日聽到樓上播玉置浩二既歌就知啦~~~ {:9_407:}
Koji Tamaki 玉置浩二 Premium Symphonic Concert
等咗幾個月終於等到呢日, 問準老闆(真係公司老闆)可以早少少收工走人, 拿拿臨同老婆食完嘢就飛車入去, 因為大鄉里未去過亞洲國際博覽館, 驚塞車又驚遲入場.....結果竟然7點10分已經到咗.....{:9_434:}
小弟覺得, 其實今次與其叫做"演唱會", 不如用"音樂會"會更加適合~~!! 無咗之前去紅館睇演唱會有好多紀念品賣, 個場設計無咩特別花神, 啲人入場又唔會有螢光嘢, 觀眾又唔會成日大叫, 音樂會分上下半場, 每場90分鐘咁上下, 好整齊~~ 感覺上好似所有人, 包括表演者都好用心咁欣賞整個音樂會~~ 小弟個人覺得為咗尊重表演者, 都唔想喺表演期間影相, 況且手機影嚟都係浪費欣賞音樂既時間, 都係用心感受好過啦~~
所以以下相係copy自concert facebook
後感
玉置浩二果然係非同凡響, 佢用咗少少類似"說唱"(即係好似李宗盛咁)形式去唱多首一聽intro都知係咩既歌, 比起每日聽CD有一種好新同好有feel既情感, 配合趙增熹既指揮同香港城市管弦樂團既演出, 睇得出佢哋唔係有好多時間去夾, 但即時交流同配合係好好~~ 玉置浩二把聲真係有超級融化靈魂既能力, 小弟一路聽一路眼濕濕~~~  而玉置浩二都無咩講過啲咩, 淨係講咗3-4句廣東話同鍾意香港呢啲"行"嘢, 全程都係演唱~~~ 抵睇~~!! 
去到最後當然都有香港表演必定會有既encore時間, 都睇得出佢哋都準備多2首歌比encore, 但我諗現場好多人都同小弟一樣覺得好感動, 最後個個企起身拍手, 拍足十幾分鐘令玉置浩二同趙增熹返入台再出嚟三次致謝~~!! 我諗....呢一個方法係表達對表演者最高既致謝喇~~~ {:9_426:}
用說話, 用故事去感動人可以好容易, 但一個全場唔計休息時間一個半鐘既音樂會, 無咩講嘢純用歌聲音樂去感動觀眾, 小弟真心覺得呢2千幾蚊比得好值~~!! 
P.S. 有傳媒集中講玉置浩二唱廣東話歌, 其實佢加埋只係唱咗3句, 仲要夾埋為咗呢3句好明顯聽到佢唱唔到感情.....不如慳返唔使咁討好香港, 唱返日本好過啦~~~ 
多謝觀看~~!!  |
[複製鏈接]
發表於 2015-11-16 11:40
樓主
⋯亦非常有新鮮感！
