|
|
樓主 |
發表於 2016-8-14 06:08
|
顯示全部樓層
本帖最後由 ghhf 於 2016-9-6 22:04 編輯
PROJECT WA5 膽皇機 現世
利益申報:
小弟無意吹虛個別產品, 試聽分享純粹係係個人特殊環境, 器材, 偏好趣向, 高低優劣, 仍小弟主觀及忠於自己有限耳感下, 對音質體驗既個人感受舒發, 並不涉及政治, 文化同任何經濟利益. 小弟言論只能作為參考, 一切應該以各位C兄自己耳聽為實!
要發生既事 始終發生咗 WE 300B到手
今日2016年8月14日, 係小弟玩HiFi歷程既一個重大日子, 要發生既事, 始終發生咗 …… 
呢對WE 300B品相一流, 亦經嚴格測試, 係戰時早期產品, 除咗輸出仲係日期配對. WE 300B到手係一個重大意義, 係小弟進入另一階段, 一連串品聽大計既先決條件(講嘢, 其實就係一心為咗要聽下WE 300B係咩料)! 矢志要聽到經典絶響, 玩膽藏膽, 義無反顧! 
WE 300B + Globe WE 274A/ WE 274B + TSRP 6SN7GT/ SYMB 6SN7W + AKG K1000 …… 用咩將佢地串連埋一齊, 成為小弟能力所及既”終極組合”? 
一個極度可怕既畫面, 已經係小弟既腦海中浮現出來 ...... 要食樹皮! 
自圓其說
舊年小弟進行咗PROJECT WA22, 小弟今年有幸成功入到一對WE 300B, 跟住就着手佈署PROJECT WA5, 砌個WA5上既WE 300B真正"終極組合", 要完成小弟心願"經典試聽"大計, 就算咬住樹皮都係咁話 ......
點解繼續選Woo Audio WA5? 咁小弟又有成桶口水自圓其説, 續步再展述 ...... 
又係小弟吹水既時候，先講些少背影，話說小弟細小年代，仲係有電子管電視機，見到就好好奇，拆哂d膽管出來睇同收藏，不過大個咗唔係做電子行業，亦無繼續研究。直到兩年前，學人玩Head-Fi系統，先知原來膽管係音響方面，係一個咁壯大既世界，而且效果變化多端，各有品性，小弟越聽越着迷，最終走入不歸路。
小弟自WA6 SE第一台膽機，主要係玩整流膽，由5U4G, GZ34玩到274，最終走到WE 274B系列。雖然已經知道有大名頂頂功率膽WE 300B，但覺得距離自己好遠，完全未有考慮過與自已有任何關係。不過當聽過好嘢之後，就會上瘾，而且越來越有要求! 
前年小弟決定升級系統，係WA22與WA5之間，小弟選咗WA22，主要係WA22係全平衡設計，有佢獨特既可玩性，而且全開放式可換膽設計，有大量膽管可換，絶對係理想符合小弟最好玩既要求。另一方面，玩WA5要配一對優質WE 300B係唔易揾到(小弟對近代版WE 300B及其他廠商各款現代版都無興趣，一心就係要聽二戰時期既WE 300B版本)，就算揾到，以小弟個人能力，亦只可能入一對，仲會驚玩死膽就住就住。當時既想法係，玩得唔開心，不如就唔好玩啦! 
回想當時選擇WA22係絶對正確，小弟真係"未夠班"玩WA5。系統配套及心理部份都未到位，玩WA22其實反而係進可攻，退可守。WA22本身完全無使小弟失望，除咗現代旗艦，特別係推錬小弟最近入手既AKG K1000時，得到既效果係讓小弟感到驚訝。WA22配合適當膽管組合，可以將KK推出"實在的震撼"(另文評述: AKG K1000 開箱與品聽)，甚至譲現代旗艦有d"花拳綉腿"失色感。小弟亦剛剛確定咗配KK既核心，已經揾到咗幾個WA22推KK既"一體臨場"效果! 咁當然，絶對唔係偶然，係出動咗小弟史無前例咁大規模膽管組合，每日品聽連續對比所得結果，從中可以睇到WA22既性能及極高可玩性! 
WA5的誘惑
小弟對WA5除咗係因為之前無選佢，覺得有d主觀既失落感之外，最使小弟在意既就係，有説WA5相對WA22係屬於"升級"。WA5只需用原厰膽管既效果，都要比WA22全副武裝，配上升級膽管既效果要更好! 
雖然WA5售價的確係WA22倍數以上計(注意: 小弟今次係想入WA5全功能版，唔係WA5 LE淨耳擴版)，兩者線路上既設計係完全唔同，WA5係單端系統，WA22係平衡系統，小弟覺得好難直接以技術性能比較，反而係對最終輸出效果既主觀評價。事實上，小弟一直既概念都係認為WA5及WA22佢地唔係一方完全超越另一方既關係，而係主觀品味取向既選擇。
不過話又要兩頭講，如果網上既主觀評論係有一定數量，咁就可能有一定客觀性既參考價值，話哂WA5及WA22係市場已有一段時間，亦算係成熟產品，主流意見應該都反影哂出來。係咁既背景下，小弟之前講到WA22咁正, 點解仲要入WA5?! 正正就係WA22咁正, 小弟就越想知WA5會係點樣!
另一方面，小弟現有係玩WA6SE及WA22時收集既整流膽(5U4G/ 274)及訊號膽(6SN7/ 6F8G)係可以繼續係WA5上使用，只係需要多一對300B功率膽，省卻咗轉玩其他品牌，使用完全唔同型號膽管，需要既額外投資。而且WA5整體設計亦係與WA22及WA6 SE風格一脈相承，同樣係對轉換膽管既性能非常敏感，非常適合玩組合效果，所以小弟繼續入WA5其實都算得上係順理成章!
WA5係前年出咗個V2版，性能及輸出配置選項功能都有所改進。除咗可以直推喇叭(小弟收咗兩隻古董喇叭，想用WA5直推)，大功率輸出能力亦更適合推動AKG K1000，好想快d知道KK係WA5上既表現，係咪真係識飛，繼WA22之後，可以再一次震撼小弟!
最後小弟做過比較，係差唔多級數既300B功放系統中，WA5售價其實相對唔算高，係功能上仲要勝一籌(音質效果方面，去到呢個級數，就係主觀品味既問題)。WA5同樣有住一貫Woo Audio産品既獨特豪邁型格設計，小弟今次會選黑色版, 不但有一種神秘力量感，而且能突出燈絲光度及展現膽管形態! 黑色WA5與小弟現有銀色WA22，擺埋一齊，一黑一銀，仲有更强烈對比效果! 配上小弟既"終極組合"膽管，就更係覇氣十足，淨係個LOOK都極有威攝力，有未聽先震腦放聽者用家既效果! 
小弟係非WA5不玩了，對WE 300B既執著又點呢? 係咪又非WE 300B不聽?
WE 300B的執着
有關注既小弟私帖C兄，知道小弟係係確定入咗一對WE 300B之後，先開始行PROJECT WA5，無錯! 如果一日未入到對正嘢WE 300B，小弟都唔會上WA5，對小弟來講，無論WA5本身性能改良到幾好，幾咁靚仔有台型，上WA5既先決條件，就係WE 300B，小弟一心就係要聽到"經典絶響"，究竟係實至名歸? 定係不過如是? 所以WE 300B係"非聽不可"，無WE 300B，小弟後續既"經典試聽"大計就無從開始!
另一方面，既然有咗WE 300B，跟住有埋WA5，咁小弟就唔會"非WE 300B不聽"。對WA5來講，只聽WE 300B就太浪費，C兄亦了解小弟唔係頑執"絶對"效果果類，即使WE 300B可以比到小弟驚喜效果，亦晤表示其他組合係WA5上比唔到小弟驚喜，小弟係持開放態度，沒有最好，各有千秋(WA5 vs WA22)，呢個係小弟一貫既理念，除非係好明顯既等級差别，咁就係，沒有最好，只有更好(WA5 vs WA6SE)!
雖然前年小弟無上WA5，係因為對WE 300B有所迷執，未敢輕言出手。不過小弟一直念念不忘，係玩WA22既同時，其實一直係有繼續關注WA5及WE 300B既動向，而且仍然抱住"進可攻，退可守"既方向，收集相關配件(5UG/ 274整流膽及6SN7訊號膽，AKG K1000耳機等等)，唯獨只差一對WE 300B! 所以時機一到，就會果決出手，自然一氣呵成! 輸出及出廠日期配對，閃電黄字，醒目靚仔，仲要有埋原廠西電盒! 呢d係小弟另一面，作為藏家既執著，出多些少逸價都係值得既!
係實際安排方面，除咗原廠膽(似乎係跟强國緒光)及WE 300B，雖然小弟都想聽下其他廠300B既效果，不過短期內都唔會再入其他廠既300B，先要徹底聽清楚，再慢慢考慮都未遲! 更何況除咗功率膽，整流膽及訊號膽亦好大程度影響最終輸出效果，小弟之前收集咗大規模既5U4G/ 274/ GZ34(WE/ Marconi/ GEC/ TS/ Mullard/ USAF 等)及6SN7/ 6F8G(TSRP，SYMB，RD，NU, RCA 等)，都係等緊今日呢個大日子，佢地配WE 300B要聽一轉所有組合，可能都要用上大半年時間! 雖然小弟話係比較現有WA22上既效果，其實通過各種組合，體驗唔同效果，先係主菜，更能了解WE 300B既性能及個性! C兄知道小弟係玩嘢之人，點會放過WE 300B，點都要逼盡WE 300B，起清佢個㡳! 小弟年尾砌好成個WA5系統，各位C兄擔定櫈仔同傘，一路聽故仔，一路防住，小弟d口沫横飛!
膽皇機 現世
嘩! 又發生咩事! 小弟明明已經食緊樹皮，仲揾d咁嘢玩 ......
唔知小弟係好彩定係唔好彩，一連見到有配對既WE 300B及WE 274A出現，好似係有意成就小弟既心願! 小弟當然係第一時間掃入WE 300B，至於WE 274A，小弟就猶豫咗2日先再入埋對WE 274A!
其實WE 274A同WE 274B係電器特性上係相同，只係封包用咗4腳(2粗2幼)，所以要加上一個5腳去4腳轉換頭，就可以直接代替WE 274B甚至係5U4G。呢對WE 274A同樣係戰時早期產品閃電黄字，又係配對及有相同出廠日期，品相亦係一流，醒目靚仔，實在少見難得!
小弟兩日後先決定入埋對WE 274A，係因為佢係意料之外，小弟之前已經儲備咗一定規模既整流膽，包括咗Globe WE 274A, WE 274B, 及WE 274A，但只有刻字版，而且成對既少。經過盤點考慮，決定要入埋呢對難得既閃電黄字WE 274A! WE 274A係為應用WE 300B而配合既整流膽，而家同之前入手既WE 300B組成絶配! 牡丹好，加埋綠葉扶持，效果必定更上層樓! 
而家係小弟既腦海中，除咗有食樹皮既悲涼，同樣有一般莫名平靜及滿足感，已經豁咗出去，無論最終體驗係不過如是，還是係名付其實既經典絶響，小弟心願已達成，再無所遺憾! 今年尾當所有配件齊備組裝之後，想像WE 300B加上WE 274A兩組閃電黄字配對膽，係黑色既WA5上點亮，就係膽皇機現世! WA5 + WE 300B + WE 274A + TSRP 6SN7GT/ SYMB 6SN7W + AKG K1000，係何其壯觀懾人，未聽已經先震撼興奮!
展望
小弟準備用上半年時間，詳聽係WA5上WE 300B既各種組合效果(配不同整流及訊號膽)，之後就會將成套終極經典膽管組合WE 300B，WE 274A，TSRP/ SYMB收存好，續後每半年再重新裝上WA5，聽番一個月大約100個鐘左右， 一年兩次大約200個鐘。一路keep住個感覺，同時亦當係複審膽管性能，保持佢地既最佳狀態。
WE 300B及WE 274A西電膽出咗名係夠耐用，NOS(New Old Stock)平均壽命可以達到40,000小時，小弟呢兩對管唔算係NOS(除咗官方權威既評定之外，其實好難確定，就算係小弟隻TV-7D都未能準確評估實際操作環境下既性能，只能做一個參考值)，不過最少應該仲有一半以上壽命，即係20,000小時!
照咁樣推算，如果每年聽200小時，都仲可以用100年，如果小心使用無咩意外，仲可以成為個人資產留比後人! 如果唔打算留比後人，假設小弟夠長命可以聽多50年，咁平均一年就可以聽400小時，即係平均每日聽番個零鐘都仲得!
小弟呢套Head-Fi系統已經發展到一定規模，雖然小弟短期內都唔會再入手新部件，現有WA22，WA6SE，STAX系統及大型電池組，再加埋WA5呢隻巨大金屬獸，巳經係唔可能繼續以茶枱作櫃，Sofa㡳藏電! 過多一段時間，小弟就會將成套系統搬去一個地方比較充裕既獨立私場，係果度繼續品聽，甚至係當私人lab工作室用，到時小弟亦可能開放地方，歡迎C兄帶同私藏毒物(特别係藏膽膽機系統)同好交流，獨樂樂變為衆樂樂。
後記
一切從玩開始
如果C兄未聽過膽音，只係好奇，走入來小弟呢個私帖，睇咗一轉，跟住發現竟然有人出咁大精力同財力，去玩膽同Head-Fi，完全不能理解? 咁係非常正常既，證明C兄係非常理性，只係未能完全體會小弟既價值判斷。如果C兄有聽過膽音，但又未覺得有特别驚喜之處，對小弟玩膽效果既興奮莫明，完全不能理解? 亦係非常正常，我地所處世界就係有咁多歧異，咁多姿多彩!
小弟唔會係第一個咁玩，亦唔會係最後一個咁玩! 事實上，小弟係行緊好多前輩C兄行過既路，藏膽玩膽，一路由WA6SE，WA22去到WA5既例子，亦唔係咩奇聞異事! 咁當然每個人行同樣既路，體驗係可以好唔同! 鍾意玩既人係大多數，有能力又願意投入既人就唔會太多，投入而又玩得精進既就㑹比較少，玩得精而又能善於導化者，少之又少!
小弟覺得自己可以算係有些少能力，而又願意投入。收藏，品聽，出文，全部就係玩亦係休息，就係所有一切源動力量既所在! 
失真率 反思 低失真? 高傳真? 無咁簡單!
最近決定入WA5，睇過網上有關膽音系統及膽管失真率評述，甚有感想，小弟又要發下騒，噴下口水，想對"失真率"作一d反思。好多時睇到一d放音系統標示出失真率，數值實在小得讓人驚訝，好似在追逐小數後幾多個零為目標，盡力表達精確無誤，竭力傳真之能事!
"失真率"係不同產品既銷售技術指標中，好多時未必係指係同一標準下測驗，單以各廠商提供對自己最有利既數據，好似橙同蘋果比較! 除非係有一個専門既review，係嚴格統一控制條件下測驗，結果就比較可信。
究竟"失真率"對一個聆聽者既真正義意係咩嘢? 作為選購決擇因素? 係今時今日呢個年代，科技産品係去到有一定質量標準，小弟自己覺得"失真率"已經唔算得上係一個決定性因素，甚至可能係淪為一個純粹"人有我有"既技術性參考數字。以小弟既WA5, WA22及WA6SE為例，前者失真率THD〈= 0.08%與後兩者THD〈= 0.3%，對聆聽者既實際義意有幾重大? 而達到THD〈=0.008%失真率，背後既義意又係咩?! 
"失真率"只係測量儀器係一個有限度片面條件下既抽樣測驗比較結果，極其量只能作為一個品質監測既保險手段，事實係失真率比較高，亦唔係一定表示"難聽"，有可能仲"好聽"咗! 推出市場既產品最終受衆既對象係人，唔係儀器! 人對各種效果，及更重要既係，佢地之間既各種相互干涉既"整體體驗"，係要來得"全面深刻"太多!
小弟爬文，睇到話膽音系統相對現代主流電晶體系統"失真率"係"太高"，所以唔會考慮選擇前者! 如果未品聽過就下咁既決定，就係有d草率及本末倒置! "失真率"係比儀器聽出來的，人係應該聽"傳神率"! (注意: 唔係"傳真率"，容許小弟作多個抽象詞彙幫助展述) 品聽之後作出既選擇，係"感受所在"，以自主自由標準"傳神率"，對比既結果，係一個真實既選擇!
好明顯，小弟所指既"傳神率"係一個主觀感性指標，同技術指標失真率無直接關係。C兄知道小弟偏好膽音系統，歸究最終原因，係小弟覺得更容易揾到"更高"既"傳神率"! 至於失真率，係達到一定客觀品質水平條件下，已經唔係值得小弟要去關心考量既地方。
其實小弟亦聽過可以感動到小弟既現代主流電晶體系統，小弟唔係二分派，完全持開放態度。低失真? 高傳真? 無咁簡單! 仲要能"傳神"，先可以感動小弟!
膽皇 都係膽
小弟聽過一句電影對白"神都係人，不過神做到人做唔到既嘢!"，小弟引呢句對白唔係想同 C兄討論神論或哲學問題，其實係想引申小弟對WE 300B既一d觀點，"膽皇都係膽"，無論如何被神化，仍離不開膽管本身電器特性既固有規律限制。
既然膽皇都係膽，離不開膽既固有形態，不過佢可以被神化，唔會純粹係一個偶然，就算真係偶然，都要有一定既機緣及最重要既元素，實力! 實力係一切傳奇既開始及基石! 無實力，如何吹捧，點樣既機緣際會，都係白白溜走，係扶唔上神壇。歷時接近一個世紀，被奉為膽皇必定係有其客觀條件，所以小弟完全唔會懷疑WE 300B既實力! 小弟又貼圖，參考各款300B既生産歷史: The 300B Tube is still Alive!
自古寶劍赠英雄，現今知音入名膽，小弟唔敢話自己係英雄，都可以勉强叫知音，呢組配對WE 300B算係有幸得手，除咗會有好效果(小弟特别去信Woo官方，確定WA5所用既300B及6SN7係需要成對的，5U4G/274就可以無咁嚴謹)，亦係有歷史價值既一面，加埋小弟現有既藏膽，真係可以起個小"神壇"'來供奉。雖然係講下笑，除咗係作為藏家一份個人虛榮執着，小弟可以為經典歷史承傳作些微貢獻，亦係感到榮幸!
其實小弟之前係有想過入番部戰時舊膽機，配埋d舊藏膽，組成真正成套懷舊經典西裝組合，甚至係跟有名衆多300B線路自己DIY一部! 不過最終都係放棄咗呢d念頭，前者涉及收復及運輸問題，後者涉及製作品質控制，小弟唔係行內人士，亦無相關工具配備，所以硬上只會係吃力而無好效果。最終選WA5現代産品配經典線路，以小弟既情況亦算係一個最佳安排! 小弟都係專注返係品聽效果上
雖然成壇嘢要年尾年先砌起，小弟對WA5配WE 300B有咩期望? 有咩效果想確定? 實際品聽佈署又係點呢? 下一節再展述 ......
WE 300B + WE 300B
小弟為咗上WA5及WE 300B，已經係全力出撃，要改食樹皮，其實係戒食街餐，改食住家飯同飲靚湯，慳$又健康 雖然係咁，小弟仍然入多咗兩粒WE 300B，佢地都係達到NOS水平，品相完好，但係唔係成配對，出廠年份係61及56年，結構唔同分别係DD及D集。相對一d離地天價叫賣，真係要感謝賣主成全，以合理價位入到佢地，小弟藏品又更豐富!
美中不足係未能完全配對，所以小弟會再等機會同緣份，入多兩粒NOS相近年份既DD及D集WE 300B，希望最終能集合到多兩對WE 300B，咁就太正啦! 以小弟當前既經濟實力，係唔可能繼續咁樣發展落去，所以小弟準備係三粒Globe WE 274A藏品中，選一粒無咁配對既，去換兩粒WE 300B，以一粒換二粒係可行既，佢地係處於差唔多既市場價位。
WA5 Tube Rolling
雖然小弟對WE 300B既實力，客觀效果唔會有懷疑，不過可唔可以吸引打動到小弟，就係另一回事。
C兄見小弟一入到對配對既WE 300B，跟住就連招大打，出手入埋一對WE 274A，再加多另外兩粒WE 300B，就知道小弟係充滿信心! 原因係，雖然小弟追求既"一體臨場"效果，係一個主觀既平衡感動，不過佢係一個組合效果既集合，即使WE 300B/ SYMB/ WE 274A/ AKG K1000既效果一開始未必完全符合小弟口味，仍可以通過其他配套，例如轉換膽管及改變線材調節。
講到Tube Rolling，小弟係玩WA22時已經對功率膽，訊號膽及整流膽之間既協調效果有一定掌握。係電池補完下，佢地對整體輸出效果既應響比率大約係5:2:3，功率膽有決定性作用，整流膽就有調和效果，至於訊號膽，相對影響較細，但係小弟發現反而係有"畫龍點睛"效果。大體效果由功率膽，整流膽決定之後，反而訊號膽先係決定"感動"與否既要匙，小弟會係另文AKG K1000 開箱與品聽交代!
雖然WA5對膽管未必有同樣既影響力分配，只要WA5輸出效果仍然對膽管變化敏感，咁出動小弟呢幾年收集既藏膽，超過10組整流膽配對包括WE，Marconi/ Osram/ GEC，TS，Mullard，USAF，Neotron及4組訊號膽對包括TSRP/ SYMB/ RD 6SN7及NU/ RCA 6F8G，要揾到個感動組合應該唔係難，只係時間問題! 
實際品聽方面，綜觀跟機既Shuguang 300B-98口碑係唔錯既，小弟會用番佢試機，行番一兩個星期，比WA5去濕排燥，熱下身先。另一方面，小弟又入咗兩對Svetlana 300B俄膽1998年份，亦係有相當口碑(點解小弟偏好俄膽? 遲d品聽時先再展述)，俄膽同原廠膽會輪流交替陪跑WE 300B(兩組WE 300B，一組配對，一組無配對亦一齊輪流品聽 )，有比較先容易聽出真相，突顯WE 300B既獨特個性。
整個WE 300B品聽計劃，其實就涉及4組300B(WE兩組, 原廠緒光及俄膽各一組)，配上4組訊號膽及10組整流膽。就咁睇已經有160個組合，如果每個組合聽番兩節(每節大約3個鐘)作初步體驗共320節，小弟每星期大約可聽10節，都要32個星期，即係8個月! 小弟最想知道既係咩效果? 第一樣當然係WA5配原廠膽係咪巳經可以砌低WA22及WA6SE上行正膽完全體既效果? 第二係WE 300B相對俄膽及原廠膽效果對比? 佢地相對既"一體臨場"感動效果又各自有咩特色? 要全部解答所有問題，8個月可能都未必夠，可能要用上一年時間! 差d唔記得小弟仲有Young DSD及Hugo兩隻品性非常唔同既DAC, 加埋可選既銅質及金銀訊號線, 咁實際可配效果會再幾倍數計!
以咁樣既規模及連續性，小弟相信對WE 300B既品聽評價，會比較客觀，心理腦放因素亦會減到最低，小弟係樂此不疲，期望對WE 300B品性有深刻印象! 有興趣C兄到時可以参考小弟既評述。當然係唔會有冷場，小弟一貫作風係會用比較抽離，形象化既方式展述，力求到位傳神! 
萬事俱備 只欠WA5
小弟出埋呢幅咁有霸氣既膽皇終極組合圖之後，PROJECT WA5呢節未聽先興奮既吹水文，就真係要告一段落啦，小弟果然真係噴咗成桶口水!
雖然標題唔係潮流大路嘢，亦已經走入比較專門狹窄範疇，都有咁多人關心，實在難得，的確小弟出文係比自己日後回味既同時，亦希望娛人同有參考價值!
講番WE 300B及WE 274A入貨及開箱，實在值得再用多些少筆墨寫多一節。兩對膽都係ebay入手既，而且係同一個賣家，佢地有一定規模，而且似乎係有非常系統化既品質監控。開箱就睇得出包裝對膽管保護一流，亦附有測驗報告(佢地用新款數字化AMPLITREX，好似話比TV-7D呢類舊式Tube Tester更準)。雖然相對係有一定溢價，亦算合理，唔係果種離地釣魚式天價叫賣，係有誠意以質量想做成生意既，呢種賣家係好榜樣，非常值得推薦! 簡單d講，賣家信譽，貨品規格，測驗證明，運費保險，及退貨條文，都係交易前要一再小心覆核注意既地方!
識貨C兄唔使小弟講，就知圖裏面係咩膽，除咗WE 300B及WE 274A，就係另外兩組出哂名既訊號膽，TSRP及SYMB。小弟準備以AKG K1000作為今次經典品聽耳機，會係TSRP及SYMB之間選一組最合適作為基準(係WA22上，小弟覺得SYMB配KK係比較合適)，實際都係要耳聽為實，睇下係WA5上，TSRP?或SYMB? 配WE 300B及WE 274A可以成為真正既"終極組合"! 萬事俱備，只欠WA5，年尾膽皇機就正式現世!
終極組合
小弟終於安全收到之前order咗既WE 300B及WE 274A兩組配對膽! 總算係鬆咗一口氣，一日未收到手，都係心掛掛!雖然係有保險，有咩閃失都有得賠，如果真係運送期間出現問題，就真係太可惜，因為已經唔單純金錢考量，而係失去咗一件歷史性珍品! 小弟繼續WE 300B及WE 274A開箱驗貨, 搞咗大半日，驗完貨就原裝封收返好WE 300B及WE 274A，等年尾WA5到手先再開箱去開箱! 去圖做記錄，又吸引下C兄眼球
膽! 膽! 膽!
呢兩日都天陰陰成日落雨，不過無妨小弟曬膽! 今日又收到幾盒好嘢，小弟又例排以好期待興奮既心情開箱咁話!
係兩粒唔同年分既WE 300B，一粒5639出廠，D集跟原裝西電盒包裝，品相一流，係典型NOS! 另一粒6113出廠，係DD集，無跟原裝盒，西電logo有d矇，膽身玻璃亦有幾處微花，品相唔算係好理想，但除此之外無咩鬆爛缺損。
兩隻WE 300B睇落係無咩長期使用過痕跡，都似係藏品，今日佢地落入小弟手中，唔知係好彩定唔好彩，不過小弟最少會比機會佢地一展所長，盡情發聲! 佢地唔係配對，但都有NOS級輸出，睇下係WA5上既效果又會係點。小弟已確定用唔配對膽，對膽本身及WA5唔會有咩損害，只係可能影響最終輸出效果。
驗完貨，過埋一輪手癮，就入番盒，之前入既西電盒而家正好用番來裝粒WE 300B，另一粒個原裝盒雖然好爛吓，不過小弟決定唔換新盒比佢，一新一舊拍埋都幾特别! 繼續等WA5! 又吹住咁多先，去圖 .......
仲有呢4粒Svetlana 300B俄膽，賣家算係唔話得，全部係9813出廠組成2配對。雖然小弟話俄膽係陪跑WE 300B，不過佢地極有可能將會係插住係小弟台WA5上最耐時間既300B，作為日常品聽，同試配了解各款訊號及整流膽效果既主力。
爬文有人話用咗呢隻俄膽差唔多10年先死，算係咁啦，不過而家個價位唔算係平，巳經差唔多係跟機强國膽既2倍價位。小弟一次過入咗4粒組成2對，唔係貪佢平，而係驚再遲d，就入唔到呢隻有返咁上下質素既近代膽，焗住入"金銀閃閃"d現代靚仔膽作為日常品聽試音。唔係有偏見話現代膽一定就唔正，不過小弟係傾向聽咗經典舊膽，再聽近代，最後先玩現代。如果有機會，遲下再出文比較不同年代膽管效果。
除咗6SN7同6F8G, 小弟入多一款5692訊號管，SYBB及RCARB版各一對，WA5同WA22又有多d效果組合
未聽先"評估" - WA5 vs WA22 vs WA6SE大比拼!
利益申報:
小弟無意吹虛個別產品, 試聽分享純粹係係個人特殊環境, 器材, 偏好趣向, 高低優劣, 仍小弟主觀及忠於自己有限耳感下, 對音質體驗既個人感受舒發, 並不涉及政治, 文化同任何經濟利益. 小弟言論只能作為參考, 一切應該以各位C兄自己耳聽為實!
雖然年尾WA5先到手，不過小弟想繼續噴口水，不但未聽先興奮，未聽先吹水，仲要未聽先"評估"WA5既效果，來個WA5 vs WA22 vs WA6SE大比拼!
其實唔使小弟去評估，無人會比Woo官方更了解自己設計既產生! 小弟先引用官方有關文件，Wooaudio_Amplifier_Comparisons總結比較各產品效果。官方對各種效果既評級以5星為最高，Woo頂級系統WA234評級全部係5星，雖然係好自然既參考基準安排，不過WA234唔係小弟既選項，所以就唔想太多，想太多驚會玩埋幅身家!
小弟係特别注意WA22，WA6SE及將入手既WA5，先睇下WA22係6項效果中官方自己既評價，WA22係悅耳度(Euphonic)得最高5星，音場空間感(Sound Staging/ Space)，音色還原(Resolution of Tone)及自然感(Naturalness)係4星半，另外兩項動態響應(Dynamic Response)及細節分析力(Resolution of Detail)就係4星。WA5係動態響應及音色還原得到最高既5星，其餘4項都係4星半。至於WA6SE，最高係動態響應有4星半，其他效果都係4星。
官方既評價可以睇到對自已產品定位，小弟對WA22及WA6SE既評定唔會感到意外，自己既感覺亦係差唔多。其中既分别相信係同產品本身既設計有關，特別係WA22既全平衡設計及WA6SE既獨立供電部件。WA6SE的確係爆發力及速度感比WA22係要勝一籌，另外悦耳度係一個有趣指標，小弟覺得係屬於比較感性，依小弟個人感受，似乎係涉及一種整體性既"柔和穩淨"場感氣氛，係WA22平衡系統相對地的確係比較容易感受到既。
好啦，跟住就係"評估"吓WA5既效果，好明顯大家都係單端系統，WA5相對於WA6SE係有絶對性既優勢，係供電部份，WA6SE雖然都有隔離供電設計，不過只係單組，WA5更上層樓，兩组火牛以兩粒整流膽各自獨立運作供電，WA5既內部亦係用咗升級更高質素零件，更何況WA5仲有獨立既300B功率放大，提供更大輸出能力，佢地評級上既差異係絶對無容置疑!
WA5及WA22效果之間既異同就係小弟要去探索既地方，官方既講法係WA22係悅耳性方面係比WA5略勝半粒星，音場空間及自然感相約，其他效果特別係動態響應，音色還原，細節分析力, WA5都要比WA22優性。如果以WA22及WA6SE之前既比較，及WA5係WA6SE既"全面性升級"，咁WA5對比WA22既官方評級似乎就係順理成章。前者係動態響應及音色還原比較突出，後者係悦耳性就比人印像深刻! 
再由産品設計角度去睇，WA5無疑係供電及內部用料質量都要比WA22優性(亦反影咗係WA5同WA22之間重量及售價多於1倍以上既差異)，前者有隔離供電組件，由兩粒整流膽提供2組獨立供電，後者係一體式設計，WA22亦無提供内部零件升級選擇。最大輸出功率方面，相對WA22既2W，WA5係佔盡優勢，4pin XLR輸出可提供高達8W功率，可以專推AKG K1000呢類低敏感度耳機。
係衆多相對較弱勢既配套條件下，WA22既全平衡線路設計，似乎係為WA22攞咗唔少分，亦係佢既獨特定位所在，官方既評級亦唔係全面性傾向WA5。對有話WA5配原廠膽可以將全副武裝既WA22砌低，小弟其實係抱質疑態度，收到WA5之後會第一時間驗證! 
最後係所用膽管，佢地可以用相容型號既6SN7訊號及5U4G整流膽，功率膽就分别係WA5既300B及WA22既6080/6AS7G/7236/5998/421A。如果單以可玩性來講，WA22係最高，有最多可配膽管組合，不過小弟最想知道既係，當配上同樣係TSRP/ SYMB訊號膽及WE 274A整流膽時，WA5既單端WE 300B設計對WA22既平衡WE 421A設計，最强對最强究竟又會差幾多呢?!
綜合各種材料及個人體驗，WA5將會非常有力量感，唔單止係大動態，富音樂感，主體輪廓亦會比較鮮明立體，仲會體現出一份"鬆容不逼"既大氣度。WA22仍然會以獨特既一份相對"柔和穩淨"空間場感氣氛帶出悅耳體驗及最高既可玩性吸引住小弟! 睇下係咪一如小弟所料! 有趣既地方係，小弟既環境，加上咗"電池補完"比較穩定既供電，WA5相對有優勢既超强隔離供電部份既作用，就會可能無咁明顯，可能會比WA22追近咗，所以最終效果亦係有一定變數!
小弟"啊媽係女人"既評估又吹完啦，多謝收睇，PROJECT WA5年尾再會!
膽機通史 - 為甚麼要用膽機? 作者: 琴俠
http://www.wowhififever.com/Stephen_Chan/step_02.htm
名膽300B沿革 - [琴俠]專欄
http://www.wowhififever.com/Stephen_Chan/step_04.htm
http://www.wowhififever.com/Stephen_Chan/step_05.htm
http://www.wowhififever.com/Stephen_Chan/step_06.htm
胆王之王 -《发烧音响》
http://www.hifi-efax.com/winziang/01.htm
利益申報:
小弟無意吹虛個別產品, 試聽分享純粹係係個人特殊環境, 器材, 偏好趣向, 高低優劣, 仍小弟主觀及忠於自己有限耳感下, 對音質體驗既個人感受舒發, 並不涉及政治, 文化同任何經濟利益. 小弟言論只能作為參考, 一切應該以各位C兄自己耳聽為實! |
評分
-
查看全部評分
|
[複製鏈接]
發表於 2016-8-15 08:31
